చిరంజీవి సిఎం కారు, కెసిఆర్ ఎన్ని చెప్పినా: లగడపాటి......

కాంగ్రెసు పార్టీ ముఖ్య నేత, రాజ్యసభ సభ్యుడు చిరంజీవి ముఖ్యమంత్రి అయ్యే అవకాశమే లేదని విజయవాడ పార్లమెంటు సభ్యులు లగడపాటి రాజగోపాల్ సోమవారం అన్నారు. చిరంజీవిని త్వరలో కేంద్రమంత్రి పదవి వరించనుందని జోస్యం చెప్పారు. త్వరలో ఖచ్చితంగా చిరంజీవిని మన్మోహన్ సింగ్ తన మంత్రి వర్గంలోకి తీసుకుంటారని చెప్పారు. విస్తరణ త్వరలో జరిగే అవకాశాలు ఉన్నాయని చెప్పారు.

తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యులు కల్వకుంట్ల చంద్రశేఖర రావు సెప్టెంబర్‌లోగా తెలంగాణ వస్తుందని చెప్పడం హాస్యాస్పదమన్నారు. ఆయన చెప్పిన సెప్టెంబర్ నెలలు ఎన్నో వచ్చాయి, వెళ్లాయని ఎద్దేవా చేశారు. రాష్ట్రం ఎట్టి పరిస్థితుల్లోనూ విడిపోయే పరిస్థితి లేదన్నారు. రాష్ట్ర ప్రజలను అనవసరంగా తెరాస నేతలు రెచ్చ గొట్టవద్దని సూచించారు.

విభజన అవసరం లేదని రాష్ట్ర ప్రజలకు ఇప్పటికే అర్థమైందన్నారు. తెలంగాణపై కేంద్రం హామీ ఇస్తే కెసిఆర్ ఉప రాష్ట్రపతి ఎన్నికలలో ఓటు వేస్తారా అని సవాల్ విసిరారు. కేంద్రం నుండి సంకేతాలు ఉన్నాయన్న కెసిఆర్ అలాంటప్పుడు ఉప రాష్ట్రపతి ఎన్నికలలో యుపిఏ అభ్యర్థికి ఎందుకు ఓటు వేయరని ప్రశ్నించారు.